حل الفنان آدم الشرقاوي ضيفا على برنامج معكم والذي تقدمه الإعلامية منى الشاذلي على قناة أون وذلك بعد منشوره المؤثر الذي تفاعل معه العديد من الجمهور ورواد مواقع التواصل الاجتماعي المختلفة والذي كشف به عن تعرضه لاكتئاب حاد وبعض الأمراض التي سببت له زيادة الوزن واختفاءه عن السوشيال ميديا بشكل مفاجئ لمدة عامين.

آدم الشرقاوي يكشف رحلته مع الاكتئاب 

وقال آدم الشرقاوي في تصريحات رصدها موقع تحيا مصر، كاشفا عن رحلته مع الاكتئاب:  بعد ما خلصت فيلم شماريخ دخلت في اكتئاب لأني مكنتش واثق في نفسي ولا كنت شايف نفسي ممثل شاطر، وده بسبب اني كنت بشوف بوستات على السوشيال ميديا بتقول أن العربي بتاعي مش مظبوط فبدأت اسأل نفسي هو انا ينفع أمثل ولا لا؟، ومن هنا بدأت مرحلة الاكتئاب ومكنتش اعرف اني داخل في الموضوع ده.

وتابع آدم الشرقاوي حديقه عن اكتشافه وجود مشاكل في الكلي، موضحا: كان عندي مشاكل في الكلي قبل ما أصيب بـ اكتئاب، انا كنت فاجئة بلاقي وزني قل وفاجئة يزيد مع اني كنت مواظب اني أروح جيم واشتغل على نفسي كتير ورغم ده الماية اللي في جسمي مكنتش بتنزل، وده كان سبب من اسباب دخولي في حالة اكتئاب.

آدم الشرقاوي: مقولتش لحد اللي بيحصل عشان ميقولوش  ضعف

واستكمل آدم الشرقاوي حديثه: مقولتش لحد على اللي بيحصلي علشان ميقولوش عليا ضعيف أو يقولوا إني مبعرفش أحل مشاكلي، أنا عنيد ومعرفتش أسأل حد يساعدني، في حاجة فيا أنا مش فاهمها ومكنتش عايز أعرف حد أن في حاجة غلط فيا لأني مكنتش عايز دي تأثر على شغلي وده تفكير غلط، معرفتش أقول لأي حد ساعدوني، كنت بفكر أني أنا اللي عملت كده في نفسي.

وعن تأثير الاكتئاب عليه، قال آدم الشرقاوي: رفضت عروض شغل لأني كنت شايف أني مش ممثل شاطر، وكنت ببص لنفسي في المراية وأقول مين ده، ولما كانوا بيكلموني على شغل مكنتش برد ولو رديت كنت ببقى عصبي جدًا بدون سبب، مكنتش سامع ولا شايف أني محتاج أصلًا، بس كلنا محتاجين دكتور نفسي.

آدم الشرقاوي وسبب اختفائه 

يذكر، أن آدم الشرقاوي قد تحدث عن سبب اختفاءه عامين، قائلا: كنت محتاج أخد بريك، من سنتين كنت تعبان جدًا، كنت قريب من 110 كيلو (250 رطل)، ما كنتش قادر أتنفس كويس، عندي ضباب في الدماغ لدرجة إني ما كنتش فاكر أيامي بوضوح، دلوقتي أقدر أقول إني أصحّ من أي وقت فات رجعت لوزني الطبيعي 80  كيلو (180 رطل)، بحس إني رياضي أكتر من أي وقت، موجود جدًا في اللحظة (مافيش ضباب دماغ)، وكل أعضائي شغالة تمام، حتى لما كنت عندي مشاكل صحية، ربنا تفضل عليّ بفرص كتير، ولما حسيت إني صحتي اتحسّنت، استغليت الفرص دي.