تحدثت الإعلامية ياسمين عز، اليوم السبت، عن أزمة اللاعب أحمد فتوح، الظهير الأيسر بالفريق الأول لكرة القدم بنادي الزمالك، في حضوره حفلة الفنان راغب علامة بالساحل الشمالي، بدون الحصول على إذن من إدارة القلعة البيضاء.

وقرر نادي الزمالك، توقيع غرامة مالية على أحمد فتوح وتحويله للتحقيق، بسبب خروجه من المعسكر الإعدادي للموسم الجديد، وحضوره أحد الحفلات بدون إذن مسبق.

وأكد عبد الناصر محمد، مدير الكرة بنادي الزمالك، أن أحمد فتوح خرج من معسكر الفريق الأبيض، بسبب مرض عمه.

وقالت ياسمين عز في تصريحات تليفزيونية عبر قناة «mbc مصر»:«ليه بتظلموا أحمد فتوح ياجماعة، ساب المعسكر، وأخذ إذن عشان عمه مريض، ومكنتوش عارفين أن عمه الفنان راغب علامه اديكم عرفتوا».

وأضافت:«طبعا كلنا عارفين أهمية صلة الرحم، طيب هل شوفتوا شهادة ميلاده والرقم القومي وعرفتوا صلة القرابة بينهم، شوفتوا الأسم ثلاثي، وعرفتوا أنه مظلوم».

واكملت:«دا اسمه أحمد محمد أبوالفتوح ودا راغب صبحي علامه، مفيش تشابه بس يمكن عمه من ناحية الأم، بلاش ظلم ليه تظلم الناس«.

وواصلت: «عايزة أقول لفتوح لما تأخد بالك أن حد بيصورك هيشوفوك يا فتوح مفيش حاجة اسمها محدش هيشوفني لا وهينزلولك على الفيس بوك، دخل وشك في القميص أو خبي وشك في كتف أخوك إمام عاشور».

وأردفت: «الأيام اللي جاية احتمال حد من العيلة يتعب سواء الفنان عمرو دياب أو تامر حسني غيره، وأنتوا عيلة فنية كبيرة طبعًا خلي بالك الفترة الجاية كلها حفلات وموسم، أنا الحقيقي مش عارفة أساعدك ازاي».

وأتمت قائلة: «أنت جيت هنا متر وتمانين يعني طويل والكل هيشوفك، مش فاهمة، نساعدك، أهو اتغرمت مليون جنيه، ودي تعتبر أعلى سعر لتذكرة في أمم أفريقيا».