أكد الإعلامي أحمد شوبير، أن وسام أبو علي مهاجم الفريق الكروي الأول بالنادي الأهلي، مصمم بشكل كبير على الرحيل عن النادي ، خاصة قبل سفر بعثة الفريق إلى تونس من أجل خوض فترة الاعداد استعدادًا للموسم الجديد، ويستعرض تحيا مصر التفاصيل. 

وقال أحمد شوبير في تصريحات إذاعية عبر راديو أون سبورت: «تعالوا نقف عند قصة وسام ابو علي لأنه في جيم بيتلعب ما بين الأهلي ووسام أبو علي أو وكيل وسام أبو علي.. وسام عايز يمشي عايز يمشي، أنا هسمي الأمور بمسمياتها يعني... والأهلي عايز وسام يكمل لكنه عايز يمشي». 

وأضاف شوبير: «أقصى عرض جيه لوسام ابو علي 6 مليون دولار مع نسب من إعادة البيع، وشغلانة نسب إعادة البيع دي هتدي للنادي السويدي القديم ياخد نسبة من إعادة البيع يعني لو المبلغ اللي هيتباع بيه 6 مليون دولار.. وهيتخصم فوق المليون دولار يعني لناديه القديم السويدي فكدن المبلغ هينقص جدا وهيقل على الأهلي». 

وواصل شوبير: «وسام هياخد في السنة من العروض اللي جاية له بشكل عام أو من النادي الأمريكي اسمه كولومبوس مرتب كل سنه لا يقل عن أربعة ونص لخمسة ونص مليون دولار يعني». 

وتابع: «وأقصى حاجة هاخدها في النادي الأهلي كام يعني؟ علشان كده وسام ابو علي من هنا خد مني كلام مصمم على الرحيل مصمم عليه.. ووسام مش عايز يسافر فترة الإعداد في تونس... واللي اتقال إنه بداعي الإصابة، وإنه النهارده هيعمل رنين مغناطيسي... أنا الحقيقة بطلب من إدارة النادي الأهلي أما يعمل رنين مغناطيسي قولوا لنا النتيجة الحقيقية .. يعني هل هو عنده شد ولا معندوش شد». 

واوضح: «الموضوع ده محرج شوية، بس أنا هتكلم بوضوح بصراحة يعني...إذا أنت حضرتك أعلنت إنه سيغيب عن المعسكر عشان الإصابة خلاص أنت اديته صك إنه يعني سليم، إنه موقفه سليم وإنه مسافرش عشان الإصابة.. لكن إذا لم يكن مصابًا وقالوا مصاب يعني لمزيد من الفحوصات وهنا بيبقى الأمر كده بيسموه بوليتيك كده سياسي شوية يعني.. فالأفضل إنه يتم الإعلان بعد الرنين عن موقفه». 

وكشف شوبير: «أنتم عارفين هو كان خرج في مباراة بورتو الأخيرة كان جاله نغزة كده وأنا سألته قالي ده أنا عندي نغزة وكنت ممكن أكمل المباراة، بس الدكتور فضل إن أنا أخرج، بس اللاعب بيبقى إحساسه كده يعني... وأحسن إنه يخرج عشان الإصابة متزيدش». 

وزاد: «فالمؤكد أن وسام يريد الرحيل، والمؤكد أن الأهلي يريد البقاء... وفي نفس الوقت الأهلي قال لك والله هات لي الثمن اللي أنا عايزه .. ما هو أنت متخدش 4.5 مليون دولار في السنة، وأنا آخد فيك أول عن آخر المفروض 6 مليون دولار هدفع لك نسبة إعادة بيع؟». 

واضاف: «أنا بس اضطريت أقول لكم الرقم اللي هياخده وسام من الخارج، عشان تبقوا عارفين بس القصة شكلها عاملة إزاي يعني.. هياخد مثلًا أربع أضعاف تقريبًا ما يحصل عليه في النادي الأهلي سنويًا، أكتر من أربع أضعاف كمان». 

وأتم: «ومن الآخر لو العرض زاد إلى 8 أو 8.5 أو 9 مليون ممكن يمشي .. طب العرض ده يزيد إزاي؟ والله وسام بقى يتخلى عن جزء من مستحقاته أول سنة هناك، إذا كان النادي اللي هيدفع له أربعة ونص أو خمسة ونص مليون دولار .. خلاص يبقى يزود للنادي الأهلي مبلغ وخلاص».